Employer na pumatay sa Pinay worker sa Kuwait, kinasuhan na

MANILA, Philippines — Iniulat ng Department of Foreign Affairs (DFA) na kinasuhan na ng Kuwaiti General Prosecutor’s Office ng “felony murder” ang Kuwaiti employer na si Bader Ibrahim Mohammad Hussain dahil sa pagpatay sa kanyang Pinay worker na si Constancia Dayag, 47.

Ang labi ni Dayag ay dumating sa Pilipinas nitong Mayo 23 at nakaburol na sa kanyang bayan sa Angadanan, Isabela.

Masayang tinanggap ng mga kaanak ni Dayag ang balita at umaasang agad na mabibigyan ng katarungan ang sinapit ng kanilang mahal sa buhay.

Una nang inihayag ng pamahalaan na nasawi si Dayag nang magtamo ng “hematoma at concussions” sa ulo at iba’t ibang bahagi ng katawan dulot ng matinding pambubugbog.

Base sa ulat, lumalabas din na inabusong sekswal ang biktima.