Holdaper na rapist utas sa shootout

MANILA, Philippines — Napatay ng mga pulis ang isang holdaper matapos itong manlaban habang aarestuhin sa ginawa nitong panghoholdap sa isang 20-anyos na dalaga na sales agent, kanya pang ginahasa kamakalawa ng gabi sa Caloocan City.

Ang napatay na suspek ay kinilalang si Jaypee Samson, alyas “Jepoy”, isang notoryus na holdaper na kilala sa Brgy. 167 Bagong Silang.

Bago nangyari ang shootout ay naglalakad pauwi ang mga biktima na sina Juan Paolo Bonifacio, 19, estudyante, at ang sales agent na itinago ang pagkakakilanlan sa may Phase 3 Munting Nayon Street, Brgy. 167 Bagong Silang nang harangin sila ng suspek na armado ng isang baril. Kinuha ng suspek ang mga cellular phones at pitaka ng mga biktima saka kinaladkad ang babae sa isang madilim na eskinita at ginahasa ang dalaga.

Matapos ang pang-aabuso ay agad na nagtungo ang mga biktima sa PCP 3 nagkasa ng operasyon na kung saan dakong alas-11:00 ng gabi nang mapansin ng mga pulis ang isang kahina-hinalang lalaki sa may Phase 3 na tumugma sa deskripsyon na ibinigay ng mga biktima.

Nang lapitan ng mga pulis ay agad umanong nagpaputok ang suspek, subalit agad na nakaiwas ang mga una.

Gumanti ng putok ang mga pulis at napatay ang suspek na kinilala ng dalawang biktima na siyang nangholdap at nanggahasa sa babae.