Ginagamit ang TRAIN, lumalabag sa srp… negosyanteng tuso, hulihin-Duterte
MANILA, Philippines — Mariing ipinag-utos ni Pangulong Rodrigo Duterte sa Department of Trade and Industry (DTI) na paigtingin ang pagbabantay sa presyo ng mga pangunahing bilihin at hulihin ang mga negosyanteng tuso o nandaraya sa presyo ng bilihin dahil ginagamit ang Tax Reform for Acceleration and Inclusion (TRAIN) Law.
Ito ang sinabi ni Presidential Spokesperson Sec. Harry Roque sa isang panayam sa radyo tungkol sa isyu ng patuloy na pagtaas ng presyo ng langis na nakakaapekto sa presyo ng mga bilihin dahil umano sinasamantala ng mga traders ang TRAIN Law.
Aminado si Roque na maraming negosyante ang nagsasamantala sa sitwasyon at nilalabag ang Suggested Retail Price o SRP ng mga pangunahing bilihin.
“Unang-una iyong DTI ay dapat magmasid at talagang hulihin iyong mga negosyante na lumalabag sa suggested retail price. Kasi ang dami ring nagsasamantala sa ngayon,” pahayag ni Roque.
Ayon pa kay Roque, hindi manhid ang Pangulo sa mga nangyayari at walang may gusto na tumaas ang presyo ng langis.
Sinabi pa ni Roque na nasa 70 porsiyento ang mga nagsasamantalang negosyante.
Ipinaalala pa ni Roque na bukod sa multa, maaari ring tuluyang ipasara ang mga tindahan na mahuhuling hindi sumusunod sa itinakdang presyo o suggested retail price.
- Latest