MANILA, Philippines — Nasugatan ang magpinsang menor de edad matapos na sila ay pagsasaksakin ng tricycle driver nang pumalag sa tangkang panghahalay sa kanila kahapon ng madaling araw sa Brgy. Nangalisan, Infanta, Pangasinan.
Ang magpinsan ay itinago sa pangalang April at May, kapwa 16-anyos, estudyante at residente sa lugar na nilalapatan ng lunas sa ospital dahil sa tinamong saksak sa katawan at braso.
Pinaghahanap naman ng pulisya ang suspek na nakilalang si Bonifacio Mirador, 20.
Sa ulat ng pulisya, dakong alas-2:00 ng madaling araw ay magkasamang natutulog ang magpinsan sa silid ng bahay ni Erwin Nafarrete nang puwersahang pasukin ng suspek at tabihan ang mga ito sa intensyong gahasain.
Nagising ang magpipinsan nang maramdaman na may humihimas sa maseselang bahagi ng kanilang katawan at inuumpisahan na silang hubaran.
Nagsisigaw ang dalawang dalagita kaya nairita ang suspek at sinaksak ang mga ito.
Nagtatakbo naman ang suspek patakas ng maramdamang nagising ang pamilya ng mga biktima.