Sa kasong crime against humanity... Noynoy atbp arestuhin - NDF
MANILA, Philippines - Iniutos ng National Democratic Front (NDF) sa Southern Mindanao ang pag-aresto kay dating Pangulong Noynoy Aquino dahil sa crimes against humanity at iba pang paglabag sa international human rights law kaugnay sa nangyaring Kidapawan massacre.
Pero agad tiniyak kahapon ni Presidential Spokesperson Ernesto Abella na bibigyan ng proteksyon ang dating pangulo at binigyan diin nito mayroon lamang iisang gobyerno at justice system sa bansa.
Dahil dito, tanging ang “appropriate body” lamang umano ang maaring magdesisyon hinggil sa nangyaring dispersal sa mga magsasaka sa Kidapawan noong nakaraang taon.
Maliban kay dating Pangulong Aquino, tiniyak din ng Malacañang ang proteksyon sa iba pang mga personalidad na kabilang sa announcement ng NDF.
“We only have one government and one justice system in the Philippines. Only the appropriate body can rule on the issue of the violent dispersal of farmers in Kidapawan.”
Magugunita na kahapon inanunsyo ng nasabing “revolutionary government” na kanilang kinasuhan sina Aquino, North Cotabato Gov. Emmylou Taliño-Mendoza, Kidapawan City Mayor Joseph Evangelista, North Cotabato Representative Nancy Catamco, at ilan pang taong gobyerno ng Republic of the Philippines, civilian personalities, military at police officials kaugnay sa nasabing insidente.
Sinabi ng NDF na nakitaan umano ng “People’s Democratic Government” ng “compelling evidence” sina Aquino at iba pang personalidad sa Kidapawan Massacre.
Maliban dito, kanila ring iniutos ang pagdakip kina Aquino at iba pa, at patawan ang mga ito ng nararapat na parusa dahil sa nasabing insidente dahil sa “war crimes, crimes against humanity and other serious violation of international humanitarian law and human rights law.”
- Latest
