MANILA, Philippines – Nagpalabas ng P50,000 reward money ang People for the Ethical Treatment of Animals (PETA) Asia para sa sinumang makakapagturo laban sa mga taong walang awang pumapatay ng pusa sa Makati City.
Inihayag ng PETA na simula noong Enero 13 ng taong kasalukuyan, nasa 12 pusa ang nawawala at natagpuang brutal na pinatay sa Dasmariñas Village ng naturang lungsod.
Sa nilabas na circular ng pamunuan ng naturang village, kada isang pusa ang unti-unting pinapatay sa pamamagitan ng pagsunog dito gamit ang isang uri ng kemikal tulad ng paint thinner.
Tiniyak ng management at security group ng Dasmariñas Village, na paiimbestigahan nila ang barbaric na pagpatay sa mga pusa ng hindi pa kilalang cat killer.
Ayon sa animal rights organization, base sa batas ipinagbabawal ang pagmamalupit at pagpatay sa mga hayop na ang sinumang lumabag dito ay papatawan ng parusang paglabag sa Animal Welfare Act of 1998 as amended by Republic Act No. 10631, na may tatlong taong pagkakakulong at may multang hanggang P250,000.00.