Blazers sinolo ang liderato
MANILA, Philippines — Tuloy ang mainit na ratsada ng College of Saint Benilde matapos igupo ang Mapua University, 73-64, para umusad sa No. 1 spot sa NCAA Season 98 men’s basketball tournament kahapon sa The Arena sa San Juan City.
Gayunpaman ay hindi natuwa si Blazers’ head coach Charles Tiu sa ipinamalas ng kanyang tropa partikular na sa huling sandali ng laro.
“I’m very disappointed. They don’t respect the game, they don’t play the right way, hindi kami maka-pull away,” galit na wika ni Tiu.
Bumandera para sa St. Benilde sina Miguel Cortez at Miguel Oczon upang buhatin ang kanilang tropa sa ikaanim na panalo sa pitong pagsalang para masolo ang liderato.
Humataw si Cortez ng 17 points, habang gumawa naman si Oczon ng 14 markers at 8 rebounds.
Dalawang sunod na tres ang pinakawalan nina Oczon at JC Cullar para dalhin ang Blazers sa 65-53 bentahe sa huling apat na minuto ng laro.
Subalit kumana ang Cardinals ng 5-0 run tampok ang isang three-point play ni Jeric Pido para makadikit sa 58-65 sa huling 3:13 minuto.
Nakalapit pa sa 62-69 ang Mapua ngunit ito na lamang ang kanilang nakayanan para makuha ng St. Benilde ang panalo.
Wala pa ring panalo ang Cardinals sa walong laro para manatili sa ilalim ng team standings.
Nanguna para sa Mapua si Adrian Nocum na may 15 points at nagdagdag si Warren Bonifacio ng 14 points at 11 boards.
Sa ikalawang laro, pinadapa naman ng nagdedepensang Letran ang San Sebastian, 77-69.
Pinaganda ng Knights ang kanilang marka sa 4-3.
Nahulog naman ang Stags sa 2-4.
Umiskor si King Caralipio ng 13 points para sa Letran at may tig-11 markers sina Louie Sangalang at Rafael Go.
- Latest