Brickman, Aquas biyaheng Finals sa T1 League
MANILA, Philippines — Swak na sa finals ng T1 League ng Taiwan si Jason Brickman at Kaohsiung Aquas matapos walisin ang Taiwan Beer HeroBears sa best-of-three semifinals sa University of Taipei Tianmu Campus Gymnasium.
Nagliyab sa 25 puntos, 14 assists, apat na rebounds at tatlong steals si Brickman upang dalhin sa championship round ang No. 1 seed na Aquas matapos ang 99-93 panalo sa Game 2.
Nauna nang tinalo ng Kaohsiung ang Taiwan, 114-91, sa likod ng 19 puntos, walong assists, dalawang rebounds at tatlong steals ni Brickman.
Ngayong Game 2, nakakuha siya ng suporta mula kina Mindaugas Kupsas, Hu Long-mao at Xavier Alexander na may 27, 14 at 12 markers, ayon sa pagkakasunod.
Haharapin ng Aquas ang mananalo sa isa pang semis pairing tampok ang Taichung Suns at New Taipei CTBC DEA matapos umabot sa winner-take-all Game 3 ang kanilang serye.
- Latest
