COVID-19 free pa rin ang PBA bubble
SMART CLARK GIGA CITY, Philippines — COVID-19 free pa rin ang PBA bubble dito sa Pampanga matapos mag-negatibo ang natitirang delegasyon kahapon papasok sa huling bahagi ng umiinit na 2020 Philippine Cup.
Ito na ang ikalimang cycle ng mandatory swab testing sa bubble bilang bahagi ng safety protocols ng PBA, Clark Development Corporation at Department of Health.
Napabilis ang resulta ng testing dahil lagpas 100 na lamang ang natitirang players at coaches sa loob ng bubble mula sa apat na nalalabing koponan na TNT Tropang Giga, Ginebra, Meralco at Phoenix.
Kasama rin sa nag-negatibo ang buong PBA Office of the Commissioner staff, table officials, statistics, referees at media delegation.
Nagsimula sa 350-strong entourage ang PBA bago malagas ang lagpas 200 mula sa nasibak na koponang Rain or Shine, Magnolia, Alaska, San Miguel, NLEX, Northport, Blackwater at Terrafirma.
May isa pang testing na naka-iskedyul sa kalagitnaan ng papalapit na finals bago ang pagtatapos ng makasaysayang All-Filipino Conference dito at pag-alis ng PBA delegation sa ikalawang linggo ng Disyembre.
*Pa-Tiktok challenge sa bubble extended--Extended ang PBAxQuest Challenge hanggang Disyembre 10 para sa mga matitirang players na nais magbahagi ng kanilang nakakaaliw na videos tampok ang amenities ng Quest Clark Conference Center sa ila-lim pa rin ng bubble safety protocols.
- Latest
