PBA ceiling nabawasan
Maaaring magbago ang takbo ng laro sa PBA sa parating na season dahil malamang na mag-adjust o mag-design ng bagong schemes ang maraming koponan sa pagkawala ng mga higanteng sina June Mar Fajardo at Greg Slaughter.
Isama na rin sa listahan si Yancy de Ocampo, ang maaaring absence pa rin ni Raymond Almazan at ang padalang na padalang na laro ni Asi Taulava.
Liliit ang size ng maraming koponan na malamang na magbago ng istilo ng laro ng PBA.
At ang pagkatapyas ng ceiling ng San Miguel at Barangay Ginebra ay maaaring magbigay daan sa mas balanseng kumpetisyon sa liga. Ibig sabihin ay hindi mawawala ang excitement o baka nga mas maging exciting pa ang bakbakan.
Iba ang kuwento kung sakaling mahilot ni coach Tim Cone si Slaughter na magbago ng desisyon na magpahinga na muna sa laro.
Sa paghihiwalay pa lamang pala nila pagkatapos ang kanilang Governors Cup championship celebration, napag-usapan na ni Cone at Slaughter ang balak ng manlalaro.
“I hope to discuss it further in the next couple of days,” ani Cone. “Obviously, his absence in the all-Filipino would be a big blow to the team and his teammates.”
*****
Tuluyan naman nang mami-miss si De Ocampo dahil nagretiro na siya pagkatapos ng dalawang dekadang PBA career.
Itinabi na niya ang kanyang playing shoes bago pumalo ng edad na 40-anyos sa March 11.
Ang No. 1 draft selection noong 2002 ay hindi namayagpag na franchise player pero nagamit ang kanyang taas na 6-foot-9 upang maging core member ng 12 champion teams.
Pinakamahabang panahon ang inilagi niya sa San Miguel Beer (2015-2020) kung saan nagsilbi siyang option na reliever kay Fajardo.
- Latest