Mighty Sports humahataw sa Dubai
MANILA, Philippines — Humataw sina naturalized player Andrei Blatche at mga imports na sina Ronaldo Balkman, Mckenzie Moore at Jalen Kendricks para tulungan ang Mighty Sports sa 77-72 paggupo sa Al Itthihad of Allepo ng Syria sa 2020 Dubai International Basketball Tournament noong nakaraang Sabado.
Ipinoste ng Mighty Sports ang 2-0 record para manguna sa team standings.
Nauna nang pinataob ng Mighty Sports ang United Arab Emirates national team, 88-82, noong nakaraang Biyernes.
“Nakakagulat ang sobrang init na pagtanggap ng mga Pinoy fans sa Dubai, bukod sa likas na galing ng ating mga manlalaro, ang kanilang mga sigaw at palakpakan talaga ang isang dahilan ng ating dalawang sunod na panalo,” ani Bong Cuevas ng Creative Pacific Group na siyang major sponsor ng Mighty Sports.
Ayon pa kay Cuevas, nagmistulang nasa homecourt ng Mighty Sports ang venue dahil sa lakas ng hiyawan ng mga Pinoy kaya inspirado ang mga players.
Nakatakdang labanan ng Mighty Sports bukas ang ES Rades ng Tunisia.
Sina Blatche, Balkman, Moore at Kendricks ang muling gigiya para sa Mighty Sports na hangad maitayo ang 3-0 kartada sa torneo.
Nais ding itampok ng Mighty Sports ang mga batang manlalaro ng Pilipinas para mahasa ang kanilang husay.
Ang mga ito ay sina Juan at Javi Gomez De Liaño mula sa UP Fighting Maroons, Thirdy Ravena at Isaac Go ng Ateneo Blue Eagles, MPBL MVP Gab Banal, Dave Ildefonso ng NU Bulldogs, Fil-Am Jaime Malonzo at sina PBA veterans Beau Belga at Joseph Yeo.
- Latest
