76ers natalo sa homecourt

PHILADELPHIA — Pinangunahan ni Ken-drick Nunn ang Miami sa pagkamada ng 26 points tungo sa 108-104 paggiba ng Heat sa 76ers na lumasap ng kanilang unang talo sa sariling balwarte ngayong season matapos iposte ang 14-0 record.

Kumonekta si Tobias Harris ng 3-pointer para idikit ang Sixers sa 104-106 sa huling 25.5 segundo habang naimintis ni Al Horford ang kanyang 3-point attempt.

Nagdagdag si Bam Adebayo ng 23 points kasunod ang 15 markers ni Duncan Robinson para sa Heat.

Sa Detroit, tumapos si Kyle Lowry na may triple-double at gumamit ang Toronto Raptors ng 11-0 atake sa third quarter patungo sa 112-99 paggupo sa Pistons.

Nagtala si Lowry ng 20 points, 10 rebounds at 10 assists para sa Raptors na naglaro na wala si guard Fred VanVleet dahil sa kanyang right knee injury.

Hindi naman natapos ni center Marc Gasol ang laro nang magkaroon ng left hamstring strain sa first quarter.

Sa Cleveland, umiskor si Collin Sexton ng 23 points at may 18 markers si Cedi Osman para pamunuan ang 100-98 pag-lusot ng Cavaliers kontra sa Charlotte Hornets.

Nagdomina ang Cleveland, nauna nang naisuko ang 16 sa huli nilang 18 laro, sa kaagahan ng laro ngunit muntik pang mabasura ang inilistang 24-point lead sa third quarter.

Limang triples ang isinalpak ni Terry Rozier, tumapos na may career-high 35 points sa panig ng Charlotte, sa fourth quarter na ang huli ay sa natitirang 21 segundo na naglapit sa kanila sa 98-100.