Lady Jet Spikers diretso sa ika-3 sunod na panalo
MANILA, Philippines — Balik ang kumpiyansa ng Philippine Air Force nang pahabain ang kanilang winning streak sa tatlo matapos walisin ang PacificTown-Army, 25-22, 25-21, 25-19, sa Premier Volleyball League (PVL) Season 3 Open Conference kahapon sa The Arena sa San Juan City.
Umariba na sa leader board ang Lady Jet Spikers at nasikwat nito ang ikaanim na puwesto bitbit ang 3-5 kartada.
Tumapos na may 20 points mula sa 17 attacks at 3 blocks si veteran middle blocker Dell Palomata para pangunahan ang tropa katuwang sina Judy Caballejo at May Ann Pantino na may tig-siyam na marka.
“Sana magtuluy-tuloy pa para makapasok kami sa top four. Iyon naman ang aim ng team makapasok muna sa top four and then another plan na naman pagdating doon,” sabi ni head coach Jasper Jimenez. “Sobrang proud ako doon sa inilaro namin dahil dati namang ginagawa tapos nawala ‘yung kumpiyansa pero ayun bumalik.”
Sa first at second set pa lamang ay trinabaho na nang husto ng Philippine Air Force ang laro sa pag-alagwa nina Palomata at Pantino para agarang kontrolin ito at nakawin ang 2-0 bentahe.
Lalong dinomina ng Lady Jet Spikers ang third set nang pinoste ang 10-0 atake para sa 21-11 bentahe sa likod ng mga quick attacks ni Palomata at aces ni Abegail Nuval.
Pero gumawa rin ng sariling ratsada ang Lady Troopers at naibaba sa 17-21 ang hinahabol ngunit hindi ito sapat.
Sa unang laro, winalis ng Creamline ang Chef’s Classics para dagitin ang pang-siyam na sunod na panalo sa liga, 25-11, 25-14, 25-21.
Lalong lumakas ang kapit ng Cool Smashers sa liderato sa bitbit na 9-0 record.
Sa Collegiate Conference, tinalo ng Adamson Lady Falcons ang Letran Lady Knights, 25-13, 25-23, 25-13, habang pinabagsak naman ng UST Golden Tigresses ang Arellano Lady Chiefs, 25-21, 25-23, 22-25, 25-23.
Pinadapa naman ng San Beda Lady Red Spikers ang San Sebastian Lady Stags, 25-22, 25-16, 25-18.
- Latest