Mainit ang simula ng Petro Gazz Angels

MANILA, Philippines — Mainit na sinimulan ng Petro Gazz ang kampanya nito matapos sukluban ang Tacloban Fighting Warays, 25-22, 25-14, 26-24 sa opening day ng Premier Volleyball League Season 2 Open Conference kahapon sa The Arena sa San Juan City.

Nagsilbing sandata ng Gazz Angels ang malalim na karanasan upang pigilan ang tangkang pagresbak ng Fighting Warays sa mga huling sandali ng third set.

Nanguna sa natu-rang ratsada si dating La Salle standout Paneng Mercado na gumawa ng 14 puntos tampok ang 11 attacks para buhatin ang Petro Gazz sa buenamanong panalo.

“Lumabas na ‘yung pinaghihirapan namin for the past few months after ng previous conference. Sobrang happy ako na na-apply namin ‘yung mga natutunan namin sa training,” ani Mercado.

Nakasakay ang Gazz Angels sa 21-17 kalamangan sa third set.

Ngunit unti-unting nakadikit ang Fighting Warays matapos ang ilang attack errors ng Gazz Angels kasabay ng ilang malulupit na down-the-line hits ni Tacloban ace hitter Jovielyn Prado, middle attack ni Mary Anne Esguerra at opposite hit ni Judith Abil.

Nagtabla pa ang iskor sa 24-all bago nag-latag si Ranya Musa ng drop shot at solidong block nina Musa at Chie Saet kay Heather Guinoo para makuha ng Gazz Angels ang panalo.