Texters pinabagsak ang Painters Beermen sumosyo

MANILA, Philippines – Kanino pa ba sasandal ang Beermen sa pagkakalagay nila sa balag ng alanganin kundi sa kanilang Most Valuable Player.

Umiskor si MVP Arwind Santos ng 27 points, habang nagdagdag ng 20 si Marcio Lassiter at 18 si June Mar Fajardo para ihatid ang San Miguel Beer sa 103-89 panalo laban sa Barako Bull sa 2014-2015 PBA Philippine Cup kagabi sa Smart Araneta Coliseum.

“Si Arwind, he wants to win. He’s our leader, he’s our captain ball,” sabi ni coach Leo Austria kay Santos na nagsalpak ng isang three-point shot para sa kanilang 94-87 bentahe sa huling tatlong minuto ng laro.

“Anytime na magkakaroon kami ng problema he’s there. Mukhang inspired na inspired siya eh,” dagdag pa ni Austria sa produkto ng FEU Tamaraws.

Nag-ambag naman si Sol Mercado ng 12 markers para sa ikatlong sunod na panalo ng Beermen.

Kinuha ng San Miguel ang isang 12-point lead, 65-53, sa third period hanggang maagaw ng Barako Bull ang 72-71 buhat sa free throw ni Carlo Lastimosa sa kaagahan ng fourth quarter.

Huling nakatabla ang Energy sa 76-76 mula sa basket ni Lastimosa bago ang pagtutuwang nina Lassiter, Santos, Fajardo, humakot din ng 11 rebounds, at Bitoy Omolon para ibigay sa Beermen ang 98-89 kalama­ngan sa huling minuto ng laro.

Nakatakdang pag-agawan ng San Miguel at Alaska ang solong liderato sa Miyerkules.

“Surprise nga ako that the energy is too low. Maybe they were thinking about our next game (laban sa Alaska),” sabi ni Austria.

Sa ikalawang laro, pinatumba ng Talk ‘N Text ang Rain or Shine,  99-76.

Pinigil ng Tropang Texters ang dalawang sunod na panalo ng Elasto Painters.

SAN MIGUEL 103 - Santos 27, Lassiter 20, Fajar­do 18, Mercado 12, Lutz 8, Omolon 8, Tubid 3, Se­me­rad 2, Ross 2, Hubalde 2, Chua 1, Pascual 0.

Barako Bull 89 - Miranda 17, Lastimosa 12, Intal 12, Fortuna 11, Lanete 10, Garcia 8, Pennisi 6, Paredes 4, Wilson 4, Salvador 2, Marcelo 2, Pascual 1, Salva 0.

Quarterscores: 26-24; 43-45; 70-68; 103-89.

TALK N’ TEXT 99 - De Ocampo 20, Washington 18, Alas 18, Ganuelas-Rosser 11, Carey 10, Castro 9, Fonacier 5, Espiritu 3, Aban 3, Wiliams 2, Labagala 0, Reyes Ryan 0, Reyes Rob 0, Seigle 0.

Rain or Shine 76 - Chan 16, Uyloan 10, Norwood 10, Lee 8, Almazan 8, Quiñahan 7, Teng 5, Cruz Jericho 5, Ibañes 2, Cruz Jervy 2, Belga 2, Tang 1, Araña 0.

Quarterscores: 29-21; 56-45; 83-60; 99-76.