PUP student patay sa hit and run

MANILA, Philippines — Namatay noon din ang isang 21-anyos na estud­yante na lalaki matapos mabundol at takbuhan ng isang tricycle sa Caloocan City, kamakalawa ng gabi.

Kinilala ang nasawi na si Jimmy Santiago III, 21, broadcasting student ng Polytechnic University of the Philippines (PUP).

Sa imbestigasyon ng Caloocan City Police, bago naganap ang insidente, alas 10:30 ng gabi sa Langit Road, North Caloocan ay minamaneho ng biktima ang kanyang motorsiklo at galing sa pagbili ng milk tea nang mawalan ng balanse sa kanyang motorsiklo.

Tiyempo namang  nag-overtake ang isang tricycle at sinalpok ang biktima  na tumilapon sa kalsada na kung saan ay hindi huminto at tuloy sa pagtakbo patungong Phase 2, Bagong Silang.

Gagamitin ng pulisya ang mga CCTV sa lugar upang matukoy ang pagkakakilanlan ng suspek.