SLP-BEST nagparamdam sa Singapore meet
MANILA, Philippines — Nagparamdam ang Swim League Philippines-Behrouz Elite Swimming Team (SLP-BEST) sa ginaganap na 17th Singapore National Swimming Championships 2022 sa OCBC Aquatic Center sa Singapore.
Bumandera sa matikas na kampanya ng Pinoy tankers ang pambato ng Quezon Province na si John Neil Paderes matapos manguna sa men’s 100m backstroke Final C.
Nagtala si Paderes ng 59.72 segundo sa finals — mas maganda sa kanyang naitalang 1:00.39 sa preliminaries.
Nakuha naman ni Mervien Jules Mirandilla ang ikalawang puwesto sa men’s 50m butterfly kung saan nagsumite ito ng impresibong 25.77 segundo.
Nakaungos ng bahagya si Rohlt Benedict ng Singapore na may naitalang dikit na 25.76 segundo para sa unang puwesto habang pumangatlo naman ang isa pang Singaporean na si Joshua Gabriel na nagrehistro naman ng 25.80 segundo.
“The competition here is really tough. The field is strong with the presence of top junior swimmers from different countries especially those from host Singapore,” ani SLP-BEST team manager Marilet Basa.
Inaasahang magpapasiklab pa ang iba pang miyembro ng SLP-BEST gaya nina Julia Ysabelle Basa, Zahjeed Isaac Sarmiento, Ashby Canlas, Alejandro Carandang, Arianna Carandang, Julian De Kam, Peter Dean, Geoffrey Liberato, Patricia Liberato, Paulo Liberato at Amina Mondonedo.
“It’s a good venue for them to hone their skills and improve their craft, learn techniques from other top junior swimmers here,” ani head coach Virgilio de Luna.
- Latest
