Banggaang Ravena bros

MANILA, Philippines — Kasado na ang banggaan ng magkapatid na sina Kiefer at Thirdy Ravena sa inaabangang pagbubukas ng 2021-2022 Japan B. League ngayong weekend tampok ang Shiga Lakestars at San-En NeoPhoenix.

 Pormal nang sinalubong ng Shiga si Kiefer matapos makakuha ng clearance sa mother club na NLEX Road Warriors at PBA, saktong isang linggo bago makipagsalpukan kay Thirdy at San-En sa back-to-back games nga-yong Sabado at Linggo.

 At para sa kuyang si Kiefer, wala munang kapa-kapatid sa unang paghaharap nila bilang Asian imports sa Land of the Rising Sun.

“This is a great honor for my family, but when game time comes, it’s difficult because we can’t treat each other as brothers. We have to play against one another just like any other team on any other opponent,” ani Kiefer.

 “As brothers, we know we bring out the best in one another. Hope we can do that and provide our team the need for us to win. Definitely, I’ll be doing my best for my team to come out on top.”

 Siguradong ito rin ang hangarin ni Thirdy na siyang unang naging Pinoy import sa B. League noong nakaraang taon bago sundan ni Kiefer at ng anim pang local cagers doon ngayong taon.

Bilang regalo sa mga masugid na Filipino fans sa Japan, libre nilang mapapanood ang tinaguriang “Sibling Rivalry” nina Thirdy at Kiefer.