Lady Spikers pinulutan ang Lady Eagles
MANILA, Philippines — Hindi na nagpatumpik-tumpik ang defending champions De La Salle University matapos harurutin sa tatlong sets ang Ateneo, 25-12, 25-22, 25-19, sa UAAP Season 86 women’s volleyball tournament kahapon sa Mall of Asia Arena sa Pasay City.
Kumana si Thea Gagate ng 15 points para sa Lady Spikers na inilista ang 3-1 record at saluhan sa second spot ang National University Lady Bulldogs.
Sinagasaan agad ng La Salle ang Ateneo sa sets 1 at 2 upang mamuro sa pagwalis sa karibal.
Nalasap ng Lady Eagles ang pangatlong talo sa apat na salang.
Sa unang laro, nilapa ng Lady Bulldogs ang University of the Philippines Lady Maroons, 25-17, 25-16, 25-17, para sa ikatlong sunod na ratsada.
Naglista si Evangeline Alinsug ng 15 points mula sa 13 attacks, 1 block at 1 ace para sa 3-1 kartada ng NU, habang nahulog ang UP sa 0-4 marka.
Nagdagdag sina Mhicaela Belen at Alyssa Solomon ng tig-10 markers para solohin ng NU ang liderato.
“We’re really happy na paunti-unti na po kaming nakakabangon sa pagkatalo namin,” wika ni Belen sa kanilang kabiguan sa pagbubukas ng UAAP.
Sunod na makakaharap ng Lady Bulldogs ang FEU Lady Tamaraws.
- Latest