Curry mihimo'g kasaysayan apan Warriors nahisukamod
CEBU, Philippines — Si NBA superstar Stephen Curry midugang og makasaysayanong dungog sa mabulokon niyang karera.
Ang alas sa Golden State Warriors nahimong labing unang NBA player nga milansang og dili mominus pito ka 3-pointers sud sa upat ka sagunson nga duwa.
Iya kining nakab-ot atol sa ilang duwa batok sa Los Angele Clippers kagahapong adlawa didto sa Chase Center sa San Francisco, California.
Apan nabaraw ang halandumon nga gabii ni Curry sa dihang ang Warriors mikolapso human mi-abante og 15 puntos hinundan nga gipayaka sila sa Clippers, 130-125.
Nasayang tanan ang maanindot nga salida ni Curry nga miposa og siyam ka tres sa iyang 41 puntos.
Si Curry napulahan sa trianggulo nilang James Harden, Paul George, ug Norman Powell nga nagkumboya'g 71 puntos alang sa Clippers.
Sa laing bahin, ang Dallas Mavericks miinat sab sa mainit nilang ratsada ngadto sa unom ka duwa human gilampornas ang San Antonio Spurs, 116-93.
Si Kyrie Irving mipupo og 34 puntos, siyam ka rebounds, ug pito ka assits alang sa Mavs samtang si Luka Doncic midonar og 27 puntos, siyam ka rebounds ug walo ka assists.
Sa ubang mga resulta, ang Cleveland Cavaliers, luyo sa 30 puntos ni Donovan Mitchell, mibangon huuman malubong og 17 puntos aron ihawon ang Chicago Bulls, 108-105, samtang ang Hapon nga si Rui Hachimura mipabuhagay og career-high 33 puntos aron ituboy ang LA Lakers ngadto sa 138-122 nga pagpayaka sa Utah Jazz. Dako sab og natampo si Anthony Davis nga mibubo og 37 puntos ug 15 ka rebounds alang sa Lakers.
Sa iyang bahin, ang kanhi bitoon sa Toronto nga si Pascal Siakam nagmadaogon sa iyang pagbalik sa Canada diin siya mitali og 23 puntos aron pangulohan ang Indiana Pacers ngadto sa 127-125 nga pagpakaging sa kanhi niya team nga Raptors.
Wala sab magpabitin si Domantas Sabonis nga mikolekta og 20 puntos ug 12 ka rebounds sa dihang gitumba sa Sacramento Kings ang defending champion Denver Nuggets, 102-98.
- Latest