JJS Electrical abante sa quarterfinals
CEBU, Philippines — Gipakaging sa JJS Electrical ang Goutsource Solutions International (GSI) sa tagakay nilang duwa pagtapos sa elimination round, 51-43 sa Javier Ceramics Cup 2023 niadtong Domingo diha sa Ateneo de Cebu sa Mango Avenue, Cebu City.
Ang JJS Electrical nga nakakapyot sa quarterfinals gipangulohan sa best player niining si Joshua Banaag pinaagi sa iyang 15 puntos, lima ka rebounds ug upat ka assists, samtang sila si Soc Ramas ug Randy Awit nagkumbinar og 21 puntos sa team ni Jeffrey Banaag.
Ang JJS Electrical ug GSI parehong adunay 2-5 nga baraha pagtapos sa eliminasyon, apan ang JJS maoy miangkon sa katapusang luna sa quarterfinals human gipilde ang naulahi.
Si Kent Sillar mipugnit og 15 puntos ug mao lang ang miiskor og double figures sa GSI ni Ivan Llesol.
Sa laing duwa, ang Jot Trucking mipukan sa Cake and Memories, 50-45 aron makuha ang awtomatik nga luna sa semifinals ning maong liga nga giorganisar sa Brothers Ball League.
Si Jeffrey Francisco nga giisip best player of the game ang nangu sa scoring sa iyang 15 puntos, pito ka rebounds ug lima ka assists nga igo na kaayo pagpadaog sa Jot Trucking ni Jeffrey Tagacanao.
Ang Cake and Memories ni Allan Paris Caballes gipangulohan ni Charlee Lumasag pinaagi sa iyang 16 puntos.
Bisan napilde, ang Cake and Memories daan nang nakasud sa quarterfinals diin ilang sangkaon ang JJS Electrical karong Domingo sa alas-8 sa gabii.
- Latest
