JMD Automotive mipukan sa JJS Electrical sa Javier Ceramics Cup

CEBU, Philippines —  Nagmangtas na sab si Lucky Mendoza aron mangu sa JMD Automotive nga mipukan sa JJS Electrical Supply, 67-60 sa Javier Ceramics Cup 2023 niadtong Domingo diha sa Ateneo de Cebu sa Mango Avenue, Cebu City.

Sa maong daog, ang JMD temporaryong nahimutang sa ikaduhang dapit uban sa Cake and Memories sa managsama nilang baraha, 4-1.

Gawas sa iyang pagpangu,  si Mendoza mao sab ang napiling best player sa iyang 23 puntos, upat ka rebounds ug upat sab ka assists.

Nanakod sab ang kamangtas ni Mendoza ngadto ni Ariel Pepito nga mipupo'g 14 puntos, ingon man nilang Roel Villagas ug Jerico Rosales nga miani'g 12 puntos matag usa alang sa JMD ni Gerald Dilao.

Ang JJS ni Jeffrey Banaag gipangulohan ni Soc Ramas sa iyang 23 puntos, gisundan nilang Randy Awit ug Francis Bauntad nga dunay 14 puntos matag usa alang sa ilang 1-4 record ning maong liga nga giorganisar sa Brothers Ball League.

Sa sayo pa, ang Jot Trucking walay puangod milubong sa Goutsource Solutions International (GSI), 74-50.

Gipangulohan ni RJ Bautista ang daog pinaagi sa iyang 18 puntos, lima ka rebounds ug tulo ka assists nga nakapahimo kaniya isip best player of the game.

Sila si JJ Vestra ug Barcoso Jr.  nag-amotay og 15 puntos, samtang si Romnick Romo miambit og 14 puntos sa team ni Jeffrey Tagacanao nga duna na'y 3-2  nga baraha.

Ang napildeng GSI gipangulohan Kent Sillar  sa iyang 18 puntos, gisundan ni Geory Apas nga dunay 10 puntos. Ang GSI ni Ivan  Llesol nagbitbit og 1-4 nga baraha.