Pelicans mibihag sa Lakers

CEBU, Philippines — Giputol sa New Orleans Pelicans ang 10 ka sagunson nilang pilde human ilang gipahagba ang Los Angeles Lakers, 131-121, sa NBA kagahapon didto sa Smoothie King Center sa New Orleans, Louisiana.

Namawi si Brandon Ingram human mabokya sa unang kuwarter aron pangulohan ang Pelicans uban ang 35 puntos.

Dako sab og natampo sila si CJ McCollum ug Trey Murphy nga nagkumboya'g 43 puntos alang sa Pelicans, nga madasigong mibangon human gibiyaan sa Lakers og 12 puntos  sa ikatulong kuwarter.

Si Anthony Davis mipabuhagay og 34 puntos batok sa kanhi niya team.

Samtang si LeBron James mi-iskor og 27 alang sa Lakers. Nanginahanglan na lang siya karon og 36 puntos aron labyan ang karaan na kaayong record ni Kareem Abdul-Jabbar isip all-time scoring leader sa NBA.

Mahimo nang makab-ot ni James ang maong dungog sa ilang duwa batok sa Oklahoma City Thunder karong Miyerkules o dili ba batok sa Milwaukee Bucks karong Biyernes.

Didto sa San Francisco, gipayaka sa Golden State Warriors ang Dallas Mavericks, 119-113, apan wala makumpleto ang ilang selebrasyon gumikan kay nakahiagum man og angol ang alas nilang si Stephen Curry.

Si Curry, nga mihipos og 21 puntos, nagtakiang nga migawas sa korte padung sa ilang locker room kay nayayay ang wala niining paa human sila magbangga ni McKinley Wright sa Mavs sa ikatulong kuwarter.

Didto sa Brooklyn, ang Nets mipatigbabaw batok sa Washington Wizards, 125-123, bisan og wala ang upat nila ka mga sinaligan nga sila si Kevin Durant, Kyrie Irving, Ben Simmons ug T.J. Warren.

Salamat ni Cam Thomas nga mipabuto og career-high 44 puntos ingon man ni Edmond Sumner nga mikadlit og 29 puntos alang sa Nets.

Sa laing aksiyon, si Giannis Antetokounmpo mikolekta og triple-double uban ang 35 puntos, 15 ka rebounds ug 11 ka assists aron pangulohan ang Milwaukee Bucks ngadto sa 123-115 nga pagbugha sa Miami Heat.

Mikuha sab og atensiyon sila si Kawhi Leonard ug Paul George nga nagkumbinar og 65 puntos sa dihang gibuntog sa Los Angeles Clippers ang New York Knicks sud sa overtime, 134-128.