3K’s , C’Mart milansang ikaduhang daog sa LBA

CEBU, Philippines — Natuman ang pangandoy sa 3K’s nga molansang sa ilang ikaduhang daog human makaipsot batok sa Jed’s, 85-82 sa LBA Christmas League 2022 niadtong Miyerkules diha sa Lamac gym sa Consolacion.

Nagmangtas og maayo si Atty. Monares ug miiskor kini’g 17 puntos aron pangulohan ang 3K’s. Gamay apan abtik nga si Lloyd Chavez nagbangis sab diin miiskor kini’g otso puntos sa first period aron tabangan ang 3K’s moposte og 25-14 nga bentaha human sa maong kuwarter. Sa kinatibuk-an si Chavez mihipos og 15 puntos. Si Kiko Palero miamot og 14 puntos, samtang si Kyor Ermac mitampo’g 12 puntos sa maong kadaogan. 

Sa maong daog, ang 3K’s aduna na’y 2-1 nga baraha uban sa CT Boys ug  sa C’Mart nga midaog sab pinaagi sa paglubong sa Azitron, 92-75.

Si Raque Malicay maoy nangu sa C’Mart sa iyang 21 puntos, gisundan ni Mano Raz nga adunay 15 puntos, samtang sila si R. Goc-ong ug Andoy nagtampohay og 12 puntos sa C’Mart nga namawi sa third period aron moiskor sa ilang ikaduhang daog.

Ang 2-2 nga Azitron gipangulohan ni Mario Tibon pinaagi sa iyang 28 puntos.

Gilubong sab sa Never Give Up ang dinaog-daog nga CebuTech sa iskor nga 72-58.

Si Vanz Abatayo nga mikadlit og 18 puntos ug Julieto Lacio, kinsa mikulit og 15 puntos maoy responsabli sa maong daog.

Ang Never Give Up pabiling nag-una sa standing sa ilang 4-0 nga baraha, samtang ang CebuTech nga gipangulohan ni Juksan Cairo sa iyang 14 puntos padayon sab nga nangiwit ning maong liga nga nahimo pinaagi sa mga paningkamot sa LBA officials ubos sa liderato sa ilang presidente Roy Ermac.