Robles malampuson  sa malisud nga hagit

CEBU, Philippines —  Nagmalampuson ang way pildeng flyweight contender sa ARQ Stable nga si Berland "The Trigger Man" Robles sa labing lisud nga hagit sa sumusulbong niyang karera.

Napuno sa kadasig, si Robles mikadlit og dalaygong kadaogan pinaagi sa unanimous decision batok ni batok ni Jerven "Iron Fist" Mama sa Sanman Gym sa main event sa "Engkwentro 7" sa ARQ Sports Promotions niadtong Sabado didto sa Consolacion National High School (CNHS) gym  a Consolacion, Cebu.     Human sa 10 ka hugna nga aksiyon, si Robles mipakita og igong katakos hinungdan nga nakuha niini ang atensiyon sa tanang tulo ka mga judges nga mi-iskor og 96-94 duha ka higayon ug 98-92 pabor kaniya.

Tungod niini, ang garbo sa Mananga II sa Barangay Tabunok, dakbayan sa Talisay miinat sa perpekto niyang record ngadto sa 6-0 uban ang 2KOs samtang gipatilaw si Mama sa ikaduha niining sunod-sunod nga pilde human sa impresibong 12-0 nga sinugdanan.

Sa supporting main event, si OPBF Silver flyweight champion ug WBC rated No.28 April Jay "Astroboy" Abne midominar ni Ramil Antaran dayon na ngadto sa makabungog nga kadaogan pinaagi sa unanimous decision.

Ang opisyal nga iskor mao ang 100-87 duha ka higayon ug 99-88 alang ni Abne, nga nagtangag na karon og 11-1 nga baraha uban ang 5KOs.

Nagmalampuson sab ang ubang mga pambato sa ARQ nga sila s Rodel "The Hulk" Wenceslao, Ramil "The Sharp" Macado, Ian Paul "Assassin" Abne, Yerroge "Scientific Boxer" Gura, ug John Vincent Pangga.

Dili hinoon pagmaya tanan ang ilang natagamtaman gumikan kay si Bryx "The King" Piala gibihag ni Ronvex Capuloy sa Big Yellow Stable.

Samtang si Bryan James "Wild Fury" Wild nakatabla lamang ni Carlo Demecillo sa Big Yellow sa eksplosibo kaayo nilang binukbukay nga nakalingaw og maayo sa bagang panon sa mga nanan-aw.