Bay Area binuhat ni Powell sa 3-0
MANILA, Philippines — May 10 points lamang si Bay Area scoring machine Myles Powell sa first half, ngunit pagdating sa second half ay hindi na siya napigilan ng Phoenix.
Nagpasabog si Powell ng 22 markers sa second half para kumpletuhin ang pagbangon ng Dragons mula sa 16-point deficit at talunin ang Fuel Masters, 101-91, sa 2022 PBA Commissioner’s Cup kahapon sa Smart Araneta Coliseum.
“We were 16 points down but in the middle of the second quarter, and the rest of the game, we made a damn good job defensively,” ani coach Brian Goorjian sa Bay Area na may 3-0 record para solohin ang liderato.
Nag-ambag si Hayden Blankey ng 15 markers kasunod ang tig-14 points nina Duncan Reid at Glen Yang.
Umiskor si Jayvee Mocon ng 22 points para sa Phoenix, may 0-3 marka, at may 21 at 17 markers sina Tyler Tio at import Kaleb Wesson, ayon sa pagkakasunod.
Kinuha ng Fuel Masters ang 41-25 kalamangan sa 6:13 minuto ng second quarter na sinundan ng 17-0 ratsada ng Dragons para sa kanilang 42-41 halftime lead.
Humataw naman si Powell ng 17 points sa third period para sa 74-59 abante ng Bay Area sa huling 41.1 segundo kasunod ang kanilang sagutan ni Phoenix coach Topex Robinson.
Tinawagan sila ng technical foul.
Huling nakalapit ang Fuel Masters sa 86-94 galing sa triple ni Tio sa 2:01 minuto ng final canto buhat sa 70-89 pagkakabaon.
Nagtuwang naman sina Powell at Reid para tiyakin ang ikatlong dikit na pananalasa ng Dragons.
Nauna nang minasaker ng Bay Area ang Blackwater, 133-87, bago tinakasan ang NorthPort mula sa buzzer-beating triple ni Powell.
- Latest
