CESAFI pre-season games mosikad na sa Bogo
CEBU, Philippines — Sugdan na sa lima ka high school teams ang ilang kampanya alang sa korona gumikan kay ang Don Celestino Martinez, Sr. Cebu Schools Athletic Foundation, Inc. (CESAFI) Pre-Season Cup mosikad na karong adlawa didto sa dakbayan sa Bogo amihanang bahin sa Sugbo.
Ang University of the Visayas (UV) Baby Lancers makigharong batok sa City of Bogo Science and Arts Academy (CBSAA) sa pasiunang duwa sa alas-4 sa hapon samtang ang defending CESAFI juniors division champion Sacred Heart School-Ateneo de Cebu (SHS-AdC) Magis Eagles makig-engkuwentro batok sa University of Cebu (UC) Baby Webmasters sa main game sa alas 5:30 sa hapon.
Ang laing entrante ning lima ka adlaw nga torneyo nga gipaluyohan sa kagamhanan sa dakbayan sa Bogo ubos sa liderato ni mayor Carlo Martinez mao ang University of San Carlos (USC) Baby Warriors.
Moduwa sila og single round robin. Ang top 2 teams maoy mag-ilog sa titulo sa tinagakay nga duwa unya sa September 25.
Ang makampiyon mobulsa og P70,000, samtang ang runner-up mokubra og P40,000. Ang tanan dunay mabitbit gumikan kay ang mopahiluna sa ikatulo ngadto sa ikalimang dapit makadawat og P30,000, P20,000, ug P10,000.
- Latest
