White siblings nagningning sa PSI Grand Prix
MANILA, Philippines — Umarangkada si Filipino-British Heather White ng Swim League Philippines-Behrouz Elite Swimming Team (SLP-BEST) matapos mamayagpag sa limang events sa 2022 PSI Long Course Grand Prix Qualifying Series NCR Leg na ginanap sa Teofilo Ydelfonso Swimming Pool sa Rizal Memorial Sports Complex sa Malate, Manila.
Inilatag ni White ang pinakamalakas na porma nito para mangibabaw sa girls’ 15-year 200m Individual Medley kung saan nagtala ito ng dalawang minuto at 32.04 segundo.
Muling umarangkada si White sa 50m breaststroke matapos magtala ng 35:31 segundo habang nanguna din ito sa 400m freestyle sa bilis na 4:47.67.
Magarbong tinapos ni White ang kampanya nito sa pamamagitan ng dalawang first-place finishes sa 100m butterfly (1:04.25) at 50m freestyle (27.00).
Nagparamdam din ng lakas si Ruben White nang maghari ito sa boys’ 50m freestyle sa bilis na 23.75 segundo.
“Swimming with the national swimmers in SEA Games, it’s nerve wracking, yet the Whites still stand out to be the best. Good job Ruben and Heather, you two have earned it, after working so hard everyday,” ani Jenny White ang ina nina Heather at Ruben na tumatayong coach.
“You showed us that you can do it without me being there. But it’s all worth it though. Congrats again. Looking forward to working with you again,” dagdag ni Jenny.
Dahil sa impresibong ipinamalas ng White siblings, pasok na ang mga ito sa susunod na round ng Grand Prix.
Una nang nagkwalipika sina Brent International School standout Micaela Jasmine Mojdeh, Marcus De Kam, Julian De Kam, Julia Ysabelle Basa, Yuan Parto, John Neil Paderes, Jules Mirandilla, Albert Sermonia, Yohan Cabana, Lance Lotino, Jenn Sermonia, Zahjeed Sarmiento, Alex Marasigan, Ashby Jayce Canlas, Peter Dean, Mikos Trinidad, Amina Mondonedo, Arianna Carandang, Mikai Trinidad, Chloe Laurente, Zandro Carandang, Shinloah San Diego, Renz Sabalvaro, Brendan Viñas, Ysabell Alterado at Lleyton Allen.
- Latest