Pinay boxers susuntok sa Thailand Open
MANILA, Philippines — Sasabak ang women’s national boxing team sa Thailand Open International Boxing Tournament na idaraos sa Abril 1 hanggang 10 sa Phuket, Thailand.
Anim na Pinay boxers ang ipadadala ng Association of Boxing Alliances in the Philippines (ABAP) sa pangunguna ni Tokyo Olympics silver medalist Nesthy Petecio.
Sasabak si Petecio sa pagkakataong ito sa lightweight division kumpara sa featherweight class na napanalunan nito sa 2019 edisyon ng Thailand Open.
Aarangkada rin si dating world champion at Southeast Asian Games gold medalist Josie Gabuco sa women’s light flyweight class gayundin si Tokyo Olympics veteran Irish Magno sa women’s flyweight.
Kasama rin sa delegasyon sina Aira Villegas (fly), Riza Pasuit (feather), Maricel Dela Torre (lightweight) at Hergie Bacyadan (middleweight).
Bago sumabak sa Thailand Open, sasalang muna ang Pinay boxers sa training camp na idaraos mula Marso 23 hanggang 30.
Pinaghahandaan ng national team ang pagsabak nito sa 31st SEA Games na idaraos sa Hanoi, Vietnam sa Mayo.
- Latest