Nets nag-una na sa East

CEBU, Philippines — Si Kevin Durant mi-iskor og 27 uban ang unom ka rebounds, siyam ka assists ug tulo ka blocks sa dihang gipakgang sa Brooklyn Nets ang Cleveland Cavaliers, 117-112, aron angkonon ang unang puwesto sa NBA Eastern Conference kagahapon.

Wala sab magpabitin si LaMarcus Aldridge nga mihipos og 21 puntos ug 11 ka rebounds ug ingon man sila si Patty Mills ug James Harden nga nagkumboya og 31 puntos alang sa Nets nga temporaryo karong naghari sa East bitbit ang 13-5 nga baraha. Didto sa Chicago, ang Bulls nauwawan sa kaugalingon nilang korte human sila gilampaso sa bisitang Indiana Pacers, 109-77.

Si Domantas Sabonis maoy nangu sa 32 puntos nga demolisyon sa Pacers sa Bulls bitbit ang 21 puntos. Dako sab og naambag sila si Malcolm Brogdon, Justin Holiday, Myles Turner ug Caris LeVert nga nagkumbinar og 54 puntos alang sa Indiana.

Sa habig sa Bulls, duha lamang ang mikadlit og double figures, sila si DeMar DeRozan ug Zach LaVine nga mipupo og 18 ug 17 puntos. Sa uban pang mga resulta, sila si Terry Rozier ug LaMelo Ball nagkumboya og 60 puntos sa dihang gipayaka sa Charlotte Hornets ang Washington Wizards, 109-103, samtang ang defending champion Milwaukee Bucks mikastigo sa Orlando Magic, 123-92.

LeBron James gisuspenso

Emmanuel B. Villaruel

MANILA, Philippines — Si LeBron James gisuspenso og usa ka duwa sa NBA human sa dugoon nilang engkuwentro ni Isaiah Stewart sa Detroit Pistons atol sa nagkagubot nilang duwa duha ka adlaw pa ang     milabay.

Ang LA Lakers superstar na-ejected sa ikaduha pa lamang nga higayon sa iyang karera gumikan sa pagsiko niini sa nawong ni Stewart taliwala sa mainiton nilang panag-ilogay og posisyon alang sa usa ka rebound sa nahibilin nga 9:18 sa ikatulong kuwarter.

Samtang nagkadugo ang nawong, si Stewart agresibo kaayong mikomprontase ni James apan maayo na lang dali siyang napugngan sa iyang mga kauban ug ubang staff sa ilang team sa matag aksiyon niya og asdang ni James.

Tungod niin, ang 20-anyos nga si Stewart gipahamtangan og duha ka duwa nga suspensiyon.

Ang NBA mipasabot nga mas bug-at ang silot ni Stewart gumikan sa pagka-agrebiso ug pagsige niini og suway og ataki ni James taliwala sa miulbong kasamok.