Doncic nagpahigot sa Mavs

CEBU, Philippines — Si Luca Doncic gikatakda nga mopirma og maximum contract extension uban sa Dallas Mavericks nga mibalor og makabungog nga $207 million.

Ang ahente ni Doncic nga si Bily Duffy mitug-an ngadto sa ESPN ug The Dallas Morning News nga ang NBA All-Star guard ug ang Mavs nagkauyon na kabahin niining maong matang.

Pormal nga ipahibawo ang nakab-ot nilang kasabotan sa usa ka virual press conference karong adlawa nga manukad didto sa Slovenia diin atoa karon si Doncic human gipangulohan ang iyang nasud sa men’s basketball event sa bag-ohay pang natapos nga 2020 Tokyo Olympics.

Apan sigun sa nanglugwa nga mga taho, ang lab-as nga lima ka tuig nga kontrata ni Doncic mosikad karong pang 2022-23 NBA season. Kini nagpasabot nga magpabilin siya sa poder sa Mavs hangtud pa sa tuig 2028.

Sa laing bahin, ang scoring partner ni Doncic nga si Tim Hardaway, Jr. nakapirma na og upat ka tuig nga kontrata uban sa Mavs sa nagkantidad og $75 million.