PetroGazz may pakay sa Chery Tiggo
MANILA, Philippines — Susubukan ng dating Reinforced Conference champion PetroGazz na sumalo sa ikalawang puwesto sa pagharap nito sa Chery Tiggo ngayong hapon sa pagpapatuloy ng Premier Volleyball League (PVL) Open Conference sa PCV Socio-Civic Cultural Center sa Bacarra, Ilocos Norte.
Nakatakda ang inaabangang blockbuster fight ng Gazz Angels at Crossovers sa ala-una ng hapon kung saan mataas ang moral ng dalawang koponan na parehong galing sa panalo.
Matapos nito, agad na susunod ang engkuwentro ng BaliPure at Sta. Lucia sa alas-4 at ng duwelo ng Perlas Spikers at PLDT Home Fibr sa alas-7 ng gabi.
Nasa solong ikatlo ang PetroGazz bitbit ang 4-1 marka kasunod ang Chery Tiggo na may 4-2 kartada.
Nasa unahan ng standings ang Choco Mucho na may malinis na 5-0 habang bumagsak ang reigning champion Creamline sa No. 2 na may 5-1 baraha.
Sariwa pa ang Gazz Angels sa matikas na 25-17, 25-18, 25-17 panalo sa Perlas Spikers noong Biyernes.
Ngunit sasagupain ng PetroGazz ang Chery Tiggo na nasa cloud nine pa matapos dungisan ang rekord ng Creamline, 25-18, 25-23, 23-25, 25-20, noon ding Biyernes ng gabi.
- Latest
