Mapapalaban ang GIlas sa Serbia

MANILA, Philippines — Masusubukan ang tunay na tikas ng bagitong Gilas Pilipinas sa pagsabak sa powerhouse na Serbia ngayon sa FIBA Olympic Qualifying Tournament sa Belgrade, Serbia.

Nakatakda ang salpukan ng Pilipinas at Serbia sa alas-2:15 ng madaling araw (oras sa Maynila).

Mapapalaban nang husto ang Gilas Pilipinas dahil nagparamdam ng puwersa ang Serbia na inilampaso ang Dominican Republic, 94-76, sa opening day ng Olympic qualifiers kamakalawa.

Sasalang pa ang Gilas Pilipinas na pilay ang lineup.

Hindi makalalaro si Dwight Ramos — isa sa mga key players ng tropa sa mga nakalipas na mga laro — dahil sa groin injury.

Galing naman si Carl Tamayo sa ankle injury kaya posibleng hindi ito makalaro o kaya ay mabibigyan lamang ng limitadong minuto.

Dagdag pasakit pa ang pananakit ng tuhod ni naturalized player Angelo Kouame na natamo nito sa second game ng Gilas laban sa South Korea.

Ngunit palaban ang Gilas Pilipinas lalo pa’t dala ng tropa ang pusong Pinoy na hindi umaatras sa laban.

Kailangang kumayod ng husto sina Kai Sotto, Isaac Go, Mike Nieto, Jordan Heading, RJ Abarrientos, Geo Chiu, William Navarro, SJ Belangel at Justine Baltazar.

“I had a very long talk with the team last night about our culture and how we aren’t even close to establishing the culture that we want to have in this program and this team,” sabi ni Gilas Pilipinas head coach Tab Baldwin sa programang Smart Sports’ Hoops Life. “For us, that’s developing the culture, that thinking so that as soon as that night is over, we are on to the next job. We don’t live in the accolades of yesterday. We try to live in the challenges of today,”

Makikipagsabayan ang Gilas Pilipinas kina NBA players Nemanja Bjelica ng Miami Heat at Boban Marjanovic ng Dallas Mavericks gayundin kina Stefan Jovic, Nikola Milutinov at Vasilije Micic.

Ang limang nabanggit na players ay bahagi ng Serbian team na lumampaso sa Gilas Pilipinas noong 2019 FIBA World Cup sa Foshan, China sa iskor na 126-67.

Matapos ang Serbia, sunod na makakasagupa ng Gilas ang Dominican Republic bukas sa parehong oras.