Jazz, Sixers ug hawks abante sa 2nd round

CEBU, Philippines — Ang Utah Jazz, Philadelphia 76ers, ug Atlanta Hawks mitagak sa hingpit sa ilang mga karibal aron pag-abante ngadto sa ikaduhang hugna sa NBA playoffs.

Sulagma sab kaayo nga pareho nilang gihuman ang tagsa-tagsa nila ka best-of-seven series sa baraha nga 4-1.

Si Donovan Mitchell mipabuhagay og 30 puntos, unom ka rebounds ug 10 ka assists sa dihang gipalagpot sa Jazz ang Memphis Grizzlies, 126-110, sa Game 5 kagahapon didto sa Vivint Arena sa Salt Lake City, Utah.

Wala sab magpabitin ang Fil-Am nga si Jordan Clarkson nga mihipos og 24 puntos ug ang sentrong si Rudy Gobert nga mipupo og 23 puntos ug 15 ka rebounds.

Lain pang mikuha og atensiyon mao sila si Bojan Bogdanovic ug Royce O'Neale nga nagkumbinar og 34 puntos, 14 ka rebounds, unom ka assists ug unom ka steals alang sa Jazz, nga makigtige sunod batok sa modaog sa serye tali sa Dallas Mavericks ug LA Clippers.

Didto sa Philadelphia, si Seth Curry mipabuto og 30 puntos alang sa Sixers nga nakasugakod bisan og wala si Joel Embiid kay dunay gihambin nga angol aron patikyaobon ang Washington Wizards sa hingpit, 129-112.

Dako sab og naambag si Tobias Harris nga mibugha og 28 puntos ug ingon man si Ben Simmons nga mirehistro og triple-double uban ang 19 puntos, 10 ka rebounds, ug 11 ka assists alang sa Sixers, nga makigharong sunod batok sa Hawks sa Eastern Conference semifinals. Ang Hawks milupad ngadto sa ikaduhang hugna sa playoffs human gipalukapa ang New York Knicks, 103-89, sa Game 5.

Si Trae Young maoy nangu sa Hawks human mirapido og 36 puntos. Gipaluyohan siya nilang De'Andre Hunter ug John Collins nga nagkumboya og 28 puntos ug ingon man ni Clint Capela nga mitali og 14 puntos ug 15 ka rebounds.