Team PHL tatapos sa Top 3 sa Vietnam SEAG — Tolentino
MANILA, Philippines — Hindi man maidepensa ang overall crown ay kumpiyansa ang mga sports officials na magtatapos sa Top Three ang Team Philippines sa 31st Southeast Asian Games sa Hanoi, Vietnam.
Sinabi ni Philippine Olympic Committee (POC) president at Tagaytay City Rep. Abraham “Bambol” Tolentino na sasalang ang mga national athletes sa 38 sa kabuuang 40 sports events sa biennial event.
“Since tayo ang overall champion, ako personally hindi tayo papayag na hindi natin salihan lahat ng event para ma-maintain natin kahit hindi ‘yung overall, mataas pa rin ‘yung ranking,” ani Tolentino.
Ang pagsasanay ng mga atleta ay apektado ng coronavirus disease (COVID-19) pandemic kung saan ilang national teams ang kailan lamang pumasok sa bubble training.
Noong 2019 Philippine SEA Games ay humakot ang mga Pinoy athletes ng kabuuang 149 gold, 117 silver at 121 bronze medals para angkinin ang overall championship.
Pumangalawa ang Vietnam na kumolekta ng 98 gold, 85 silver at 104 bronze medals.
Halos kalahati sa isinabak na 1,115 national athletes noong 2019 edition ang ipapadala ng POC sa 2021 Vietnam SEA Games, ayon kay Tolentino.
Noong Biyernes ay tinurukan ng COVID-19 vaccine ang mga miyembro ng Team Philippines na lalahok sa 2021 Vietnam SEA Games na nakatakda sa Nobyembre 21 hanggang Disyembre 2.
- Latest
