Suns giunhan ang Lakers, Sixers mibugha sa Wizards

CEBU, Philippines — Si Devin Booker mipabuto og 34 puntos aron pangulohan ang Phoenix Suns ngadto sa 99-90 nga kadaogan batok sa Los Angeles Lakers sa pasiunang duwa sa ilang best-of-seven Western Conference playoff series Misalida sab si Deandre Ayton uban ang 21 puntos ug 16 ka rebounds ug ingon man sila si Mikal Bridges ug Cameron Johnson nga mi-iskor og 10 matag usa alang sa Suns nga naglaraw moposte og 2-0 nga bentaha sa serye karong Miyerkules didto gihapon sa ilang balwarti.

Igo lamang nga nakalabaw og singko puntos ang Lakers sa unang kuwarter gumikan kay ang Suns mi-arangkada sa second half diin sa usa ka higayon mi-abante sila og 16 puntos.

Minghoy kaayo ang opensa sa Lakers. Si LeBron James igo lamang mipuntos og 18 samtang si Anthony Davis nalimitahan ngadto sa 13 puntos ug mipasud lamang og lima sa 16 niiini ka itsa.

Sa laing duwa, si Tobias Harris mipabuhagay og 37 puntos sa dihang gipakaging sa Philadelphia 76ers ang Washington Wizards, 125-118, pagsugod sa kaugalingon nilang serye sa East.

Wala sab magpabitin si Joel Embiid nga mikolekta og 30 puntos ug ingon man sila si Seth Curry ug Danny Green nga nagkumboya og 26 puntos.

Bisan og miposte lamang og sayes puntos, si Ben Simmons mihimo gihapon og kasikas uban ang 15 ka rebounds ug 15 sab ka assists.

Ang Sixers wala na molingi pa sukad sila milabaw og 11 puntos sa sayong bahin sa katapusang kuwarter.

Nangu sa Wizards mao si Bradley Beal uban ang 33 puntos, 10 ka rebounds ug unom ka assists samtang si Russell Westbrook mitunol og 16 puntos, 15 ka assists ug lima ka rebounds sa pilderong kawsa.