Kouame aminadong may nararamdamang pressure
MANILA, Philippines — Excited na si naturalized player Angelo Kouame na maglaro suot ang Gilas Pilipinas jersey sa dalawang FIBA tournaments na lalahukan ng tropa sa susunod na buwan.
Ngunit kalakip ng excitement ang matinding pressure na dala nito dahil sa magandang ipinamalas ng dalawang naunang naturalized player ng Pilipinas na sina Marcus Douthit at Andray Blatche.
“Yeah. I actually feel the pressure,” ani Kouame sa programang 2OTxCrossover ng SMART Sports.
Ngunit ayaw ni Kouame na magpadala sa matinding pressure.
Sa halip, nais nitong mag-enjoy sa paglalaro kasama ang kanyang teammates na itinuturing na nitong kanyang bagong pamilya.
“You know, it depends on whether I put myself on other people’s thoughts, or play the way I always play. If people have their eyes on me and believe that I have potential, I have to believe in my potential too and then go with the flow,” ani Kouame.
Nakatuwang ng Gilas Pilipinas si Douthit para makuha ang fourth place finish noong 2011 FIBA Asia Championship.
Sa kabilang banda, kasama ng national team si Blatche nang gumawa ng ingay ang Pilipinas sa FIBA World Cup noong 2014 sa Spain. Naglaro rin ito sa 2019 FIBA World Cup sa China.
Ayaw naman ni Kouame na maikumpara ito kina Douthit at Blatche.
Gagawin na lamang nito ang kanyang role sa team upang magkaroon ng magandang resulta ang kanilang kampanya.
Sasabak ang Gilas Pilipinas sa FIBA Asia Cup Qualifiers sa Hunyo 16 hanggang 20 sa Clark, Pampanga at sa FIBA Olympic Qualifying Tournament sa Hunyo 29 hanggang Hulyo 4 sa Belgrade, Serbia.
- Latest
