Philippines fencing team inalat

MANILA, Philippines — Minalas ang mga national fencers na makatusok ng tiket para sa 2021 Olympics Games matapos mabigo sa kani-kanilang dibisyon sa Asia Oceania Olympic Qualifiers sa Tashkent, Uzbekistan.

Isang 12-15 kabiguan ang nalasap ni 2019 Southeast Asian Games gold medalist Jylyn Nicanor kay Lim Wai Lam ng Hong Kong sa quarterfinals ng women’s saber at nakalasap si Hanniel Abella ng 3-15 pagkatalo kay Amarzaya Batsaikhan ng Mongolia sa women’s epee.

Yumukod din sa kani-kanilang mga laban sina Nathaniel Perez, Samantha Catantan, Noelito Jose at CJ Concepcion. Natalo si Perez kay Chen Chih Chieh ng Chinese Taipei, 9-15 sa men’s foil habang natakasan si Jose ni Mohsin Abbas ng Iraq, 14-15 sa final 16 ng men’s epee.

Isang 10-15 pagkatalo ang nakuha ni Catantan kay top seed Yana Alborova ng Uzbekistan sa semis ng women’s foil at isinuko ni Concepcion ang 9-15 iskor kay No. 7 Alexandre Douglas ng Australia sa quarters ng men’s epee. Bagama’t natusok ng 19-anyos na si Catantan ang bronze medal ay hindi naman niya nakamit ang Olympic berth.

Ang best fencer sa bawat weapon at category ang mabibigyan ng natitirang mga Olympic seats dahil nakuha na ang iba via world ranking at sa mga OQTs sa ibang mga kontinente.