Nets namukot og laing daog
CEBU, Philippines — Harden mirehistro ika-11 ka triple-double karon nga season
Nagmangtas na sab si James Harden diin mibugha siya og 40 puntos, 15 ka assists ug 10 ka rebounds alang sa iyang ika-11 ka "triple-double" niini nga season aron pangulohan ang Brooklyn Nets nga namukot og 124-115 nga kadaogan batok sa Indiana Pacers sa NBA kagahapon didto sa Indianapolis.
Ang All-Star guard nga si Harden gibantayan og duha sa fourth quarter, apan nakamaneho gihapon pag-iskor 14 puntos uban ang unom ka rebounds ug upat ka assists.
Gilupig sa Nets sa pinuntosay ang Pacers, 35-24 sa final period.
Niduwa ang Nets nga wala gihapon ang All- Stars nilang si Kyrie Irving, Kevin Durant ug ang bag-ong nakuha nga si Blake Griffin tungod sa ilang tagsa -tagsa ka injury.
Nakatabla ang Nets, 96-all sa sayong bahin sa fourth quarter kortesiya ni Harden. Nahimo kadtong pabilo sa 13-4 run sa Nets nga naglakip sa usa ka 3-pointer ug lay-up ni Harden aron moposte og 109-100 nga bentaha.
Si Joe Harris miamot og 19 puntos, samtang sila si Jeff Green ug Tyler Johnson nagtampohay og 15 puntos sa Nets. Gipangulohan ni Malcolm Brogdon ang Pacers nga mikamada og 24 puntos, si Domantas Sabonis nga mirehistro og "triple-double" uban ang 18 puntos, 11 ka rebounds ug 11 sab ka assists.
Sa laing mga aksiyon, ang Detroit Pistons midaog batok Toronto Raptors, 116-112, midaog sab ang Milwaukee Bucks sa Philadelphia 76ers pinaagi sa overtime, 109-105, gilubong sa Denver Nuggets ang Charlotte Hornets, 129-104 ug ang Dallas Mavericks mipukan sa Los Angeles Clippers, 105-89.
- Latest
