NLEX, Blackwater mi-trade sa No.4 draft pick

CEBU, Philippines — Ang giatngan nga 2021 PBA Draft ipahigayon duha pa ka adlaw gikan karon apan ning higayona duna nay nahitabong pagbinayloay og players.

Una ang NLEX Road Warriors nga mi-trade sa ilang No.4 pick sa unang hugna sa PBA Draft karong Dominggo ngadto sa Blackwater hulip nilang Roi Sumang, Don Trollano, Morris Shaw ug 2022 second round draft pick sa Bossing.

Human naselyado ang ilang kasabotan sa NLEX, ang Blackwater mihatag sab dayon sa ilang katungod nga mokuha sa No.4 draft pick ngadto sa TNT Tropang Giga puli nilang Simon Enciso ug David Semerad ug ingon man ang 2023 first round draft pick ug 2024 second round pick sa TNT.

Ang duha ka mga kasabotan parehong gi-aprubahan sa PBA trade committee.

Lagmit pagapilian sa TNT ni coach Chot Reyes isip maoy ilang No.4 pick mao sila si Jamie Malonzo, Joshua Munzon, Mikey Williams, ug Franky Johnson.

Dako kaayong tabang ang maong lakang sa Tropang Giga gumikan kay ang pambato nilang si Bobby Ray Parks mipadayag na mang daan nga dili moduwa sa umaabot nga PBA Season 46.