Nets nakasagunson na og walo ka daog

CEBU, Philippines — Namaling na sab og daog ang Brooklyn Nets pinaagi sa paglubong sa Orlando Magic, 129-92 sa duwa nila sa NBA kagahapon didto sa Barclay's Center sa New York.

Si Kyrie Irving misapyaw og 27 puntos uban ang siyam ka assists ug si James Harden miayag og 20 puntos alang sa Nets aron sumpayan ang nagkadina nilang daog ngadto sa walo ka duwa sukad kini nibalhin ngadto sa Brooklyn.

Ang Nets mao na karon ang  miiskor og  labing taas nga sunod-sunod nga daog sa NBA ug ilang kinatas-an sukad nihimo og usa ka franchise record-tying 14 game run sa hinapos sa 2005-2006 season. Nibiya sila gikan sa New Jersey ngadto sa Brooklyn niadtong 2012. Wala gihapon si Kevin Durant, kinsa napalta sa iyang unom ka sunod-sunod nga duwa tungod sa injury (strained left hamstring).

Si Landry Shamet mitampo og 19 puntos ug siyam ka rebounds sa Nets nga milusad og makalilisang nga 26-4 run.

Mihimo'g 28 puntos ug 12 ka rebounds si Nikola Vucevic alang sa Magic nga nasagunsonan og duha ka pilde human milansang og tulo ka sunod-sunod nga daog.

Nindot pa ang salida sa Magic sa sayong bahin sa duwa ug ilang pa nga gipahamtangang og singko puntos nga biya ang Brooklyn sa unang sayes minutos sa first quarter. Apan didto ra kutob ang maayong labok sa Magic, kay ang Nets mipabuto og 12-2 nga bomba sa tunga-tungang bahin sa second quarter nga naghatag kanila og 44-38 nga bentaha. Gibingat pa ang labaw ngadto sa 65-47 human sa nag-unang duha ka kuwarter.

Didto sa Philadelphia, si Joel Embiid mihipos og 23 puntos ug siyam ka rebounds, samtang si Ben Simmons adunay 15 puntos alang sa Philadelphia 76ers nga mipilde sa Dallas Mavericks, 111-97 didto sa Wells Fargo Center.

Gipakita nilang Embiid ug Simmons nga angayan silang mapili sa All-Star dihang mipakitang gilas sila sa second quarter pinaagi mga lusot, kawat sa bola ug ingon man dunk aron pangulohan ang 76ers ngadto sa nindot nga rekord sa Eastern Conference uban ang 22-11.