Heat nanginit

Mikabya og upat ka sunod-sunod nga daog

CEBU, Philippines — Wala pa huwasi sa kainit si Jimmy Butler  ug iyang na sab nga gipangulohan ang Miami Heat pagkulit og laing daog.

Si Butler miduslit og 27 puntos diin 14 niini iyang nahimo sa fourth quarter alang Heat nga milansang sa ilang ikaupat nga sunod-sunod nga daog pinaagi sa pagpilde sa Toronto Raptors, 116-108 sa NBA kagahapon didto sa Miami. Mihimo sab si Butler og 10 ka assists ug walo ka rebounds alang sa Heat. Miposa sab siya og season-high tulo ka 3-pointers, duha niini gikan sa katapusang minuto sa duwa.

Si Bam Adebayo midagkot og 19 puntos ug 12 ka rebounds sa Miami, si Duncan Robinson mipuno og 17 puntos ug si Goran Dragic mitampo'g 15 puntos sa iyang pagbalik gikan sa ankle injury. Kini ang ikawalong daog sa katapusang 11 ka duwa sa Heat  nga nisugod sa season uban ang 7-14. Ang Heat anaa karon sa ikawalong dapit sa Eastern Conference standing bitbit ang 15-17 nga baraha,

Si Kyle Lowry nga nibalik gikan sa thumb injury miposa og 24 puntos sa Toronto. Aduna sa'y 24 puntos si Fred VanVleet sa Raptors, si Norman Powell miambit og 17 puntos ug si OG Anunoby mihirit og 14 puntos sa naparot nga Raptors nagpabilin sa ikalima dapit uban ang 15-17 win-loss record. Sa laing mga aksiyon, ang Charlotte Hornets nakaipsot sa Phoenix Suns, 124-121, ang Oklahoma City Thunder mipakurog sa San Antonio  Spurs, 102-99, midaog sab ang New Orleans Pelicans batok sa Detroit Pistons, 128-118, ang Chicago Bulls misungag sa Minnesota Timberwolves, 133-126.

Gilubong sa Clevelnd Cavaliers ang Houston Rockets, 112-96, ang Atlanta Hawks milubong sab sa Boston Celtics, 127-112 ug ang Golden State Warriors mipukan sa Indiana Pacers, 111-107.