PSL beach volley papalo ngayon!

MANILA, Philippines — Lalarga ngayong araw ang mainit na hatawan sa 2021 Gatorade-Beach Volleyball Challenge Cup na idaraos sa Subic Bay Metropolitan Authority (SBMA) sand courts.

Rambulan ang walong koponan na hinati sa Pool A at Pool B.

Masisilayan sa Pool A sina Jenny Mar Senares at Kyla Angela Gallego ng F2 Logistics, Ariane Luna Alarcon at Christina Canares ng PetroGazz, Bang Pineda at Jonah Sabete  ng Sta. Lucia-2 at sina Alexa Polidario at Erjan Magdato ng Abanse Negrense-1.

Nasa Pool B sina DM Demontano at Jackie Estoquia ng Sta. Lucia-1, Ella Viray at Theresa Ramas ng United Auctioneers, Jennifer Cosas at Gelimae Villanueva ng Abanse Negrense-2 at Jonah San Pedro at Javen Sabas ng Toby’s Sports.

Sa unang laro, papalo ang bakbakan ng F2 Logistics at PetroGazz sa alas-8 ng umaga kasunod ang engkuwentro ng United Auctioneers at Abanse Negrense-2 sa alas-9.

Raratsada ulit ang F2 Logistics laban naman sa Abanse Negrense-1 sa alas-10 at ang United Auctioneers at Toby’s Sports sa alas-11.

Sa hapon, aarangkada ang salpukan ng Sta. Lucia-2 at Abanse Negrense-1 sa alas-2 kasunod ang laro ng Sta. Lucia-1 at Toby’s Sports sa alas-3, Sta. Lucia-2 at PetroGazz sa alas-4, at Sta. Lucia-1 at Abanse Negrense-2 sa alas-5.

Sa format ng torneo, ipatutupad ang round robin sa bawat pool para malaman ang final ranking sa crossover quarterfinals.