Ancajas mipasalig dili paapekto taliwala sa pandemiya

CEBU, Philippines — Mag-usa ka tuig na kapin nga wala makaaway si Jerwin Ancajas, apan ang reigning IBF world super flyweight champion nipasalig nga dili kini makaapekto sa iyang performance sa pagbalik unya niya og saka sa ring.

Si Ancajas (32-1-2, 22KOs) modepensa sa iyang IBF title sa ikasiyam nga higayon batok ni mandatory challenger Jonathan Rodriguez (21-1, 15KOs) karong Abril sa wala pa matino nga  binyu.

Sumala pa ni Ancajas nga nakita niya ang iyang kaugalingon kaniadto ngadto sa Mehikanong boksidor nga si Rodriguez. Pareho sila og laraw dihang linghod pa kaayo siya nga boksidor  nga damgong mamahimong usa ka world champion.

“He has few fight videos online and we can't find sparring videos at all. He posts on social media, looking determined and saying hashtag April and the new,” matud pa ni Ancajas ngadto sa GMA News Online.

“It is an added motivation and challenge for me because I see myself in him when I was still a challenger. So now I am training hard so I can give him a good fight.”

Ang  29-anyos nga si Ancajas wala makapakita'g aksiyon sukad niadtong Disyembre 2019  dihang iyang gipilde si Miguel Gonzalez pinaagi sa sixth-round technical knockout.

Napanalipdan ni Ancajas ang kalibotanong titulo sukad niadtong 2016 human sa iyang unanimous decision nga kadaogan batok ni McJoe Arroyo.

Ang umaabot nga away ni Rodriguez batok ni Ancajas maoy iyang unang higayon sa pakigsangka alang sa kalibotanong titulo.

Si Ancajas walay hunong sa iyang ensayo bisan pa kapila mauswag ang iyang title defense tungod sa Covid-19 pandemic.