MJAS-Talisay Aquastars pormal gipaila

CEBU, Philippines — Pormal nang gipaila ang MJAS Zenith-Talisay City Aquastars basketball team nga mopakita'g aksiyon sa labing unang Pilipinas Vismin Super Cup nga gikatakdang sugdan karong Abril 9 ubos sa istriktong patakaran sa panglawas ug kaluwasan sud sa bubble.

Mitambong sa pormal nga pagpa-ilaila sa team niadtong Huwebes sa hapon didto sa San Remigio Pensionne Suites sa Barangay Mabolo, Dakbayan sa Sugbo mao sila si Vismin Cup secretary-general Chelito Caro, league ambassador Dondon Hontiveros, team consultant Wilson Villanueva ug Atty. Marc Bas, Deej Villanueva ug Jeanneth Villagonzalo sa Talisay LGU. Gipangulohan ni team captain Paulo Hubalde, ang MJAS-Talisay nilang team owners Samson ug Arlene Lato gilangkuban sa kanhi mga bitoon sa Cebu Schools Athletic Foundation, Inc. (CESAFI) nga sila si Patrick Jan Cabahug ug Tristan Albina (UV), Darell Shane Menina ug Lugie Cuyos (UC),  Kevin Villafranca (USJ-R) ug Joshua de la Cerna (CIT-U).

Nagkumpleto sa line-up sa Aquastars mao sila si Jaymar Gimpayan, Lord Casajeros, Egie Boy Mojica, Steven Cudal, Val Acuna, Allan Dominic Santos, Mel Francis Mabigat ug Jhaymo Eguilos.

"We have high expectations for the team because of our competitive line-up. We really aspire to become the first champion in the league and make history," matud pa ni MJAS-Talisay team consultant Wilson Villanueva.

Sa iyang bahin, si Deej Villanueva sa Talisay LGU nga maoy nagrepresentar ni mayor Samsam Gullas nagkanayon nga dakong tabang sa ilang programa sa basketbol ang pagsalmot nila sa propesyonal nga liga, apan miangkon nga mag-atubang sab kini og daghang mga hagit.

Ang MJAS-Talisay usa sa upat ka teams nga kompirmadong mokumbati sa Visayas Division sa labing unang pro basketball league nga nakabasi sa habagtang mga probinsiya sa nasud. Ang laing tulo mao ang ARQ Builders/Lapu-Lapu City Heroes ni Jason Arquisola, KCS-Mandaue City Megabytes ni Ricky Verdida ug XUR Homes Realty-Eastern Samar ni Jojo Gio Baquilod.