Ayaw kompiyansa

Taliwala sa pandemiya, nagmalampuson ang gipahigayong NBA bubble didto sa Orlando, Florida diin gitiwas sa liga ang naputol niining 2019-2020 season sa miaging tuig.

Apan karon nga wala na'y bubble, lahi ang nahitabo sa liga ning tuiga. Dul-an sa 20 na ka players ang nataptan sa gikahadlokang coronavirus, apil na niini sila si Karl Anthony Towns sa Minnesota Timberwolves ug Seth Curry sa Philadelphia 76ers. Ang nagkadaghan nga kaso sa Covid-19 sa NBA miresulta ngadto sa pagkasibog sa dili momenos 16 ka mga duwa ning linghod nga season nga midagan og upat pa ka semana.

Ako kining gihisgutan agi'g pahinumdum kanatong tanan nga wa'y gipili kining virus, unsa man ang estado nato sa kinabuhi. Naigo man gani ang mga NBA players nga sikat, milyonaryo, guwardiyado ug nagpuyo sa eksklusibong dapit, unsa pa kaha kadtong mga dili susama nila og kaharuhay sa pagpuyo. Busa kitang tanan magmatngon gyud sa kanunay ilabi na kay wala pa gyud mikalma ang mangtas nga virus nga padayon gihapong nanghasi hangtod ning panahona. Nadungagan pa gani ang atoang kakuyaw gumikan sa pagsulbong ning bag-ong klase sa virus nga nanalingsing gikan sa Covid.

Mahinungdanon kaayo nga isilsil nato sa atong alimpatakan nga bisan tuod og gipaluagan na gamay sa mga otoridad ang mga restriksiyon sa kuwarantin aron kita makalihok-lihok ug maaktibo og balik ang atong ekonomiya, mosunod gihapon kita sa tanang mga patakaran sa panglawas ug kaluwasan nga gimando sa atong kagamhanan. Patuo ta nila ug dili gahion ang atong ulo kay alang man sab ni sa atong kaayohan.

Kinahanglan nga kita mag-amping ug mabinantayon sa tanang higayon gumikan kay ang dili hikit-an natong kontra anaa pa sa atong palibot ug padayong nanghulga sa atong kinabuhi. Angayan natong huna-hunaon nga kon ato kining buhaton, dili lamang kini alang sa kaugalingon natong kaayohan, apan hasta sab sa atong pamilya ug sa tibuok katilingban.