Nuggets mipukan sa 76ers

CEBU, Philippines — Miugkat og 21 puntos si Gary Harris, samtang si Nikola Jokic miukla og 15 puntos, 12 ka assists ug siyam ka rebounds dihang ang bisitang Denver Nuggets milansang og 115-103 nga kadaogan batok sa undermanned nga Philadelphia 76ers sa NBA kagahapon.

Parehong miiskor og 14 puntos sila si Jamal Murray ug Will Barton alang sa Nuggets nga mibuak sa sikit kaayo nila nga duwa human sa haftime.

Silang JaMychal Green ug Monte Morris nakatabang sab og dako sa kadaogan sa Nuggets nga parehong mitampo'g 12 puntos.

Ang Nuggets niduwa nga wala si Michael Porter, kinsa gikuwarantin tungod sa Covid-19 safety protocols.

Ang rookie nga si Tyrese Maxey maoy nangu sa Sixers pinaagi sa pagposte og career-high 39 puntos. Si Isaiah Joe miambit og 13 puntos ug si Dakota Mathias adunay 12 puntos, samtang si Tony Bradley, Dwight Howard ug Danny Green miamot og 11 puntos matag usa alang sa 76ers nga pito ra ka players niduwa.  Ang duha ka sunod-sunod nga kapildihan sa 76ers nakabugto sa nagkadinang 20 ka daog sa ilang korte. Katapusan silang napilde sa ilang balwarte niadtong Disyembre 20, 2019.

Niduwa ang Sixers nga wala si Seth Curry, kinsa nagpositibo sa coronavirus atol sa ilang kapildihan batok sa Brooklyn Nets niadtong Biyernes.

Pipila sab ka players sa 76ers wala paduwaa batok sa Nuggets kagahapon agi'g pagsunod sa health and safety protocols. Naglakip kini nilang Tobias Harris, Shake Milton ug Matisse Thybulle. Wala sab si Joel Embiid  ug Ben Simmons tungod sa ilang injury.

Sa laing mga resulta, ang Phoenix Suns mipilde sa Indiana Pacers, 125-117, ang Charlotte Hornets mibihag sa Atlanta Hawks, 113-105, ang Miami Heat mipakaging sa Washington Wizards, 128-124, samtang ang Milwaukee Bucks mipukan sa Cleveland Cavaliers, 100-90.

Midaog sab ang San Antonio Spurs pinaagi sa overtime batok sa Minnesota Timberwolves, 125-122, ang Dallas Mavericks mipakgang sa Orlando Magic, 112-98 ug ang Portland TrailBlazers milubong sa Sacramento Kings, 125-99.