Celtics lusot sa Heat; 76ers giniba ang Wizards
MIAMI - Wala si rookie guard Payton Pritchard sa nakaraang season nang matalo ang Celtics sa Heat sa Eastern Conference finals.
Ang putback ni Pritchard sa huling segundo ng fourth quarter ang nagtakas sa 107-105 panalo ng Celtics kontra sa Heat.
“To be honest ... I didn’t think we were playing,” sabi ni Boston coach Brad Stevens na ikinunsiderang hindi maglaro dahil sa nangyari sa U.S. Capitol. “And then coaches left the room, players finished talking and chose to play.”
Humataw si Jayson Tatum ng 27 points at may 21 markers si Jaylen Brown para sa Celtics (6-3) na sinayang ang itinayong 17-point lead at 10-point lead sa huling minuto ng laro.
Umiskor si Jimmy Butler ng 26 points sa panig ng Heat (3-4) at may 16, 15 at 14 markers sina Duncan Robinson, Bam Adebayo at Goran Dragic, ayon sa pagkakasunod.
Sa Philadelphia, nalampasan ng 76ers (7-1) ang unang career 60-point game ni Bradley Beal para sa Washington Wizards (2-6) matapos kunin ang 141-136 panalo.
Nagtala si center Joel Embiid ng 38 points para pamunuan ang pagsapaw ng Philadelphia sa ginawa ni Beal na nabigong pantayan o lampasan ang career-high 62 markers ni Stephen Curry para sa panalo ng Golden State Warriors laban sa Portland Trail Blazers noong Linggo.
Sa Milwaukee, nagposte si Giannis Antetokounmpo ng 25 points at may 23 markers si Khris Middleton para sa 130-115 pananaig ng Bucks (5-3) sa Detroit Pistons (1-7).
Sa Indianapolis, kumamada si Malcolm Brogdon ng career-high 35 points para tulungan ang Indiana Pacers (6-2) sa 114-107 paggupo sa Houston Rockets (2-4).
Sa Orlando, inangkin ng Magic (6-2) ang 105-94 panalo laban sa Cleveland Cavaliers (4-4) tampok ang 20 points ni Terrence Ross habang may 19 markers si Dwayne Bacon.
- Latest
