James, Davis bida uli sa Lakers vs Grizzlies
MEMPHIS, Tenn. — Idiniretso ng nagdedepensang Los Angeles Lakers ang kanilang arangkada sa apat matapos ungusan ang Grizzlies, 94-92, tampok ang tig-26 points nina Anthony Davis at LeBron James.
Kumolekta rin si James ng 11 rebounds at 7 assists at may 12 markers si Dennis Schroder para sa 6-2 baraha ng Los Angeles.
Tumipa sina Jonas Valanciunas, Dillon Brooks at Gorgui Dieng ng tig- 13 points para sa Memphis (2-5) at may 12 markers si Brandon Clarke.
Sa Denver, nagposte si center Nikola Jokic ng 35 points, 15 boards at 6 assists para akayin ang Nuggets (3-4) sa 123-116 paggupo sa Minnesota Timberwolves (2-5).
Nagdagdag sina Will Barton at reserve JaMychal Green ng 20 at 17 points, ayon sa pagkakasunod, para sa Denver.
Sa New York, umiskor si guard Kyrie Irving ng 20 sa kanyang 29 points sa first half para ihatid ang Brooklyn Nets sa 130-96 pagdaig sa Utah Jazz.
Nag-ambag si Caris LeVert ng 24 points at kumolekta si Jarrett Allen ng 19 points at 18 rebounds para sa Nets (4-4), nakakuha kay Joe Harris ng 10 points.
Sa Los Angeles, sinikwat ng San Antonio Spurs (3-4) ang 116-113 tagumpay laban sa Clippers (5-3) tampok ang 21 points ni Dejounte Murray.
- Latest
