Nets gilihian og daog
Durant, Irving kuyaw kaayong nakaduwa
CEBU, Philippines — Kuyaw kaayong nakaduwa si Kevin Durant sa iyang pagbalik, samtang miasenso sab ang dinuwaan ni Kyrie Irving uban sa Brooklyn Nets nga gilihian og daog batok sa Golden State Warriors, 125-99 sa unang duwa sa NBA 2020-2021 season kagahapon didto sa Barclay's Center sa New York.
Si Durant mipabuto og 22 puntos sud lang sa 25 minutos sa iyang unang opisyal nga duwa sa Nets sukad mabusgak iyang Achilles tendon samtang niduwa pa kini sa Warriors sa Game-5 sa 2019 NBA Finals.
Mibiya sa makadiyot si Durant human operahi ang iyang injury ug wala na makaduwa sa tibuok 2019-2020 season ultimo sa wala pa masuspenso ang liga niadtong Marso tungod sa Covid-19 pandemic.
Si Durant nihimo sa iyang unang tulo ka shots, usa ka 3-pointer ug nirehistro dayon og double figures sa wala pa'y singko minutos. Wala sab paalkanse si Irving nga miposa og tulo ka 3-pointers ug adunay 17 puntos sa kapin nuuybe minutos sa unang kuwarter dihang ang Nets nilabaw og dili momenos 21 puntos.
Si Irving ang nangulo sa Nets nga misapyaw og 26 puntos, samtang si Caris LeVert miambit og 20 puntos.
Ang Nets gidahom nga makig-indigay sa Eastern Conference title human nakuha silang Durant ug Irving nga magkauban sud sa korte.
Si Stephen Curry adunay 20 puntos ug 10 ka assists alang sa Warriors, ang gititi nga team nga gitan-aw nga walay nada dili sama ilang kalig-on kaniadto nga nidaog og duha ka titulo sa tulo ka season nga pagduwa ni Durant.
Ang No. 2 pick nga si James Wiseman nga limitado og preparasyon miamot og 19 puntos ug unom ka rebounds. Apan ang Warriors niduwa nga wala si Draymond Green tungod sa sore right foot ug Klay Thompson nga giingong dili kaduwa sa ikaduhang sunod-sunod nga season.
- Latest
